Mancha no cu dos tomates ou peseta do tomate

 

MANCHA NO CU DOS TOMATES OU PESETA DO TOMATE

Cantas veces lles oímos dicir ós donos das hortas que se lles apestaron os tomates para referirse a unha mancha escura redondeada que lles sae a estes no cu? É un problema moi común posto que non só lle afecta a tomates, senón tamén a pementos, cabaciñas e berenxeñas.

Preguntámoslles ós nosos maiores se sabían a que era debido esa mancha e a maioría das veces dixéronnos que era debido a un exceso de auga. E TIÑAN RAZÓN! EN PARTE

Os cus apodrecidos comezan cunda perda de cor da parte inferior do tomate, a seguir a pel deprímese e contráese engurrándose nunha depresión circular. Finalmente, a pel abrándase e cambia a súa tonalidade a marrón escuro case negro.

As causas deste feito son dúas:

1. Falta de calcio. Pode ser que a terra teña unha carencia deste nutriente, pero o máis habitual é que a planta non sexa capaz de facer un bo aproveitamento del porque non o toma do solo dun xeito adecuado debido a un rego deficiente.

2. Rego inadecuado. Pode ser que a planta fose regada deficientemente, tanto por execeso como por defecto. Se recibe pouca auga, o sistema radicular da planta case non se desenvolvería e non é capaz de captar o calcio que necesita. Se o rego foi excesivo, as raíces estarán enchoupadas e tamén apodrecidas e non serán capaces de absorber moitos nutrientes, entre eles o calcio.

Unha vez que se dá este problema no tomate, xa non ten solución. Eses tomates xa van ter o cu negro (a parte non afectada pode comerse igualmente), pero iso non quere dicir que outros tomates que dea a planta teñan ese problema.

En cando se detecte a mancha negra no tomate pódese tentar achegarlle á terra un extra de calcio regando con leite diluído en auga.

Unha medida a longo prazo se se tiveron problemas de cu negro nos tomates, é botarlle á terra cascas de ovos machacados para que na próxima plantación haxa un extra de calcio.

O que se pode facer sempre é PREVILO. Como? Pois NON REGANDO DIRECTAMENTE NO PÉ DA PLANTA, senón un pouco máis lonxe para obrigar a esta a que busque a auga e así se desenvolvan as súas raíces correctamente.

PROPOSTAS DE AULA

Dar a coñecer esta enfermidade tan habitual do tomate e investigar cal é a maneira máis correcta para facer o rego nas hortas (momento do día, técnica de regado...). Por último, prácticar no noso horto.

FONTES

https://todohuertoyjardin.es/blog/como-combatir-la-mancha-en-el-culo-del-tomate

https://www.agrohuerto.com/culos-podridos-en-tomate-como-solucionarlo/

https://www.agrorganics.com/es/blog/cultivo-del-tomate-la-necrosis-apical-o-culo-negro-del-tomate/

(Traballo e proposta de aula realizados polo departamento de bioloxía cos alumnos de 3º da ESO)